Rosalía Dans entrega as chaves da casa da súa nai ao Concello para convertela nunha Casa Museo na súa memoria
- Ademais do museo Mª Antonia Dans, proxéctase unha escola de pintura.
- A actriz reuniuse con veciños e amigos da súa mocidade nun acto no que o Concello fíxolle entrega dun recordo dese día.
A actriz Rosalía Dans, filla da pintora María Antonia Dans, fixo entrega ao alcalde curtiense, Javier Caínzos, das chaves da vivenda familiar en Curtis, o último paso pendente para que o Concello poida comezar a rehabilitación do inmoble para convertela nunha Casa-Museo e nunha escola de pintura en recordo da súa nai, a pintora neoexpresionista María Antonia Dans.
A entrega das chaves serviu ademais, para que a actriz se reencontrase con numerosas veciños e amigos da súa mocidade. O alcalde e a concelleira de Cultura, Eva Lata, aproveitaron para entregarlle unha figura de recordo (unha muller cun queixo, un dos emblemas do municipio) dun día tan emotivo para ela e o concello.
Nesta vivenda a súa nai pasou a súa infancia e mocidade e era a casa onde sempre volvía para pintar e inspirarse nas paisaxes e nas xentes curtienses. O proxecto quere manter con vida a memoria da pintora e impulsar a vida cultural do municipio coa apertura dunha Casa Museo e a posta en marcha dunha escola de pintura nas dependencias externas á vivenda principal.
O inmoble, que dispón dunha protección especial na PXOM, é unha estrutura típica do municipio, onde destaca especialmente a súa balconada. Ademais das obras de recuperación dá a casa, o Concello rehabilitará o mobiliario, orixinal da época, que se atopa moi danado.
Novas relacionadas: