O Concello de Curtis eliminará en 2018 a temporalidade do seu persoal unha vez levantadas as restricións do Goberno

• O Goberno local presentou o proxecto de Orzamentos de 2018 aos sindicatos e provisionou unha subida salarial dos empregados municipais dun 1,5%.
• O soldo do alcalde Javier Caínzos conxélase por quinto ano consecutivo.

O Goberno local do Concello de Curtis presentou hoxe aos sindicatos e aos representantes dos traballadores municipais o proxecto de Orzamentos para 2018, que recolle, no capítulo I de gastos de persoal, unha provisión económica para a subida dos seus salarios dun 1,5% á espera de que o Goberno central confirme que este será o incremento final para todos os empregados públicos unha vez que sexa aprobado nos Orzamentos Xerais do Estado.

A esta reunión, á que se convidou a CSIF, CCOO, UGT e CIG e aos representantes dos traballadores, só acudiron estes últimos e CSIF como forza sindical.

O alcalde curtiense, Javier Caínzos, explicou que este ano, unha vez que se rebaixaron as restricións na contratación de persoal imposta estes últimos anos de crise polo Goberno central, procederase a consolidar postos de traballo e a dar cobertura ás prazas que a lei dispón co obxectivo de erradicar a temporalidade existente. Segue así as pautas, ademais, de que a taxa de cobertura temporal en cada Administración se sitúe antes de que finalice 2019 por baixo do 8%.

O Goberno local tamén prevé que durante 2018 fágase efectiva a relación de postos de traballo adaptada ás necesidades do Concello.

Conxelación salarial do alcalde e primeiro tenente de alcalde

Os salarios que si se conxelarán serán os do alcalde, por quinto ano consecutivo, co que cobrará a mesma cantidade que en 2013, 34.147 euros, o que o sitúa entre os máis baixos da comarca en relación a municipios con igual ou similar número de habitantes, por baixo de Oza-Cesuras, Sobrado, Paderne, Abengondo, Aranga e Mesía. Tamén se conxelará a outra dedicación exclusiva, a do primeiro tenente de alcalde, Antonio Fraga, de 33.847,54 euros, que asumiu o ano pasado.