Investiranse 2,8 millóns para impulsar a concentración parcelaria de Fisteus, a máis grande de Galicia
- A conselleira de Medio Rural e o alcalde Javier Caínzos avaliaron hoxe este e outros investimentos da Xunta na localidade.
- Ambos destacaron tamén os preto de 125.000 euros achegados á cooperativa Cusoviame dentro das axudas para uso de maquinaria en común.
A conselleira do Medio Rural, Ángeles Vázquez, reuniuse hoxe en San Caetano co alcalde de Curtis, Javier Caínzos, para avaliar os diferentes investimentos realizados pola Xunta a prol do agro neste concello coruñés.
Ambos destacaron o impulso dado á reestruturación parcelaria da parroquia de Fisteus, cunha achega de Medio Rural que supera os 2,8 millóns de euros. Estes fondos destinaranse a varias actuacións, como a execución da rede de camiños principais e o marqueado dos novos predios de substitución. Esta parcelaria abrangue unha superficie total que rolda as 4.000 hectáreas, o que a converte na máis grande das abertas actualmente en Galicia.
Ademais, a conselleira e o rexedor municipal valoraron a subvención de 124.703 euros que recibiu a cooperativa Cusoviame, con sede neste concello, dentro da orde de axudas da consellería para o uso de maquinaria en común correspondente ao exercicio de 2017, para un investimento total próximo aos 250.000 euros.
Por último, ambos responsables coincidiron en reafirmar o seu compromiso de seguir traballando polo medio rural de Curtis en eidos como o das infraestruturas ou o asociacionismo agrario, pensando na mellora da mobilidade e, por extensión, da calidade de vida dos seus veciños.