O Concello abre expediente a un supermercado de Curtis por reincidencia no mal uso dos colectores de residuos
- O Goberno local lembra, ademais, que este supermercado rexeitou o servizo municipal gratuíto de recollida de papel cartón a domicilio tres veces á semana.
O Concello de Curtis notificou esta semana ao supermercado Día sito en Curtis a apertura dun expediente por reincidencia no uso indebido dos colectores de recollida de residuos sólidos urbanos.
O Goberno local xa advertira á empresa de que debía de depositar os residuos de maneira correcta tal e como fixa a ordenanza e o regulamento da prestación do servizo e, con todo, fixo caso omiso e, como mostra a foto, os colectores verdes de residuos orgánicos están cheos de papel cartón.
Ademais, o Concello lembra que o supermercado rexeitou o servizo municipal gratuíto de recollida de papel cartón a domicilio tres veces á semana, así como a instalación dun colector de papel cartón.
A sanción prevista pode ser de 100 euros, pero pode elevarse se se teñen en conta, ademais da reincidencia e do rexeitamento a facer uso dos servizos municipais, as diversas campañas realizadas desde a Administración local para concienciar sobre a obrigación da recollida selectiva, que facilita a reciclaxe e abarata o custo desta prestación. As campañas incluíron, ademais, a visita dun concelleiro e técnicos a comercios e hostalaría para coñecer as súas necesidades e explicarlles os servizos.