Caínzos comprométese a trasladar á Xunta o malestar dos veciños de Fisteus co proceso de concentración parcelaria
O alcalde de Curtis, Javier Caínzos, vén de manter unha reunión urxente cos implicados na concentración parcelaria de Fisteus, que lle manifestaron a súa preocupación polo xeito no que se está a producir este proceso.
Os afectados afirman sentirse excluídos dos procesos participativos e tomas de decisións, e acusan ós técnicos da Xunta de ignorar ós órganos creados para levar a cabo a concentración: a Xunta Local e a Comisión de Traballo.
Ante esta situación o alcalde curtiense comprometeuse a trasladar as queixas e demandas veciñais ó director xeral de Desenvolvemento Rural, Miguel Ángel Pérez Dubois, para tratar de recuperar o ambiente de colaboración e participación inicial.