O Boletín Oficial da Provincia publica hoxe a modificación para a relación de cargos municipais con dedicación exclusiva no Concello de Curtis. Nos orzamentos do 2017, tal e como informara xa o Goberno local, creouse unha segunda dedicación exclusiva, que se suma á do alcalde, que conxela o seu salario por cuarto ano consecutivo.

A nova dedicación exclusiva créase debido á carga de traballo que suporán, entre outros temas, a presentación de ambiciosos proxectos a fondos europeos, a posta en marcha de novos servizos en solo empresarial e a potenciación do Polígono Industrial de Teixeiro, a elaboración e coordinación dos novos plans de mobilidade así como da estratexia ambiental e as relacionadas coa estratexia de promoción e prevención de saúde, as modificacións da PXOM, a elaboración do inventario municipal, a xestión do convenio de vivendas baleiras e a coordinación de todo a área de participación cidadá, á que se lle dará un novo impulso.

A dedicación será para o actual primeiro alcalde, Antonio Fraga, que estaba a levar nas últimas lexislaturas os temas relacionados co Medio Ambiente e Promocón Economía e Industrial.
O salario desta dedicación non suporá ningunha carga para as contas municipais cando termine a lexislatura.

• Enlace ao BOP 12 xaneiro 2017
• Anuncio do Concello de Curtis

• O último trimestre do ano concentrou a metade das saídas de todo 2016, aínda que o maior número de accidentes de tráfico ocorreron de xaneiro a marzo.

O GES de Curtis triplicou o número de emerxencias atendidas en 2016 respecto ao ano anterior, ao pasar de 248 saídas en 2015 a 729, é dicir, unha media de dúas diarias.

As retiradas dos niños de Vespa Velutina foron as causantes deste importante incremento na carga de traballo xa que supuxeron o 71,46% (521) do total de actuacións deste Grupo de Emerxencias Supramunicipal. Os meses de novembro e decembro foron os máis conflitivos en canto a alarmas pola presenza desta agresiva avispa, con 236 retiradas.

A atención en accidentes foi a segunda causa que provocou máis saídas do GES de Curtis, que recibiu un total de 164 alertas, 102 de tráfico, catro con necesidade de excarceración. Ademais, o Grupo axudou a apagar 21 incendios (cinco menos que en 2015), deles 9 urbanos e 5 forestais; participou nunha ducia de traslados sanitarios en helicóptero e acudiu a 33 chamadas por animais soltos nas vías.

Os meses de máis traballo por número de alertas foron os do último trimestre do ano (outubro, novembro e decembro), onde se concretaron a metade das saídas de todo 2016, aínda que o maior número de accidentes de tráfico ocorreron no primeiro trimestre (xaneiro, febreiro e marzo).

O ámbito de actuación do GES de Curtis, no que traballa un persoal estable e profesionalizado de doce efectivos, tamén abarca os municipios de Sobrado, Vilasantar, Mesía, Oza-Cesuras e Aranga, é dicir, cobre unha extensión de 800 quilómetros e dá servizo a unha poboación de 18.000 veciños.