As piscinas municipais de Curtis e Teixeiro inauguran a tempada de baño deste verán o venres, 19 de xuño, a partir das 15:00 horas. As instalacións permanecerán abertas ata o 31 de agosto, os sete días da semana, en horario continuado de 12:00 a 20:00 horas.

Ademais da oferta de lecer, o Concello pon en marcha os Cursos de Natación 2026, que se desenvolverán durante os meses de xullo e agosto nas piscinas das dúas localidades. A oferta inclúe tres modalidades: iniciación, perfeccionamento e aquagym, cun prezo de 20 euros ao mes.

As clases impartiranse os martes e xoves en Curtis e os luns e mércores en Teixeiro. Os horarios aproximados estableceranse en función dos grupos o primeiro día de clase, aínda que, aproximadamente, o de iniciación comezará ás 12:15 horas, o de perfeccionamento ás 13:00 horas e o de aquagym ás 13:45 horas. Os grupos terán un mínimo de 8 persoas e un máximo de 15.

O prazo de inscrición permanecerá aberto ata o 23 de xuño. As solicitudes poderán presentarse nas oficinas municipais ou na sede electrónica. Unha vez comunicada a admisión, as persoas participantes deberán realizar o pagamento antes do día 1 de cada mes, xa que de non facelo poderán perder a praza.

Publícase a resolución pola que se incorporan novas solicitudes presentadas fóra de prazo aos Campamentos de Verán para a conciliación familiar e laboral 2026, ao existir prazas dispoñibles nas quendas solicitadas.

As persoas admitidas nesta resolución deberán presentar o xustificante de pagamento das quendas asignadas ata o día 18 de xuño de 2026.

A relación de persoas admitidas pode consultarse no Taboleiro de Anuncios e nesta ligazón: 2026_06_12_decreto_de_incorporación_solicitudes_fora_de_praza_campamentos_2026_copy.pdf.