Caínzos presenta a III Poxa de Elite de Gando Frisón, "que volverá situar a Curtis como centro de referencia do sector lácteo no panorama nacional"

• A presentación da única poxa deste tipo que se celebra en Galicia tivo lugar o fin de semana no Concurso de Raza Frisoa de Santa Comba.

O alcalde de Curtis, Javier Caínzos, presentou a III edición da Poxa de Elite de Gando Frisón que organiza o Concello de Curtis, a única deste tipo que se celebra en Galicia para impulsar a calidade xenética das explotacións gandeiras e pór en valor o traballo e o investimento dos titulares. Estivo acompañado polo concelleiro Emilio Souto, e de Alberto, titular da explotación de Curtis que participou nas anteriores edicións.

A Poxa de Elite, que se presentou no Concurso de Raza Frisoa de Santa Comba celebrado este fin de semana, organizarase os días 16 e 17 de marzo.

O rexedor puxo en valor esta terceira edición tras o éxito das dous anteriores, "que serviron para situar a Curtis no centro do sector gandeiro frisón no panorama nacional xa que se achegaron compradores de todo o país para coñecer as mellores gandarías de Galicia, con animais cunha altísima cualificación morfológica e xenética".

Caínzos destacou como obxectivo principal desta poxa a dinamización da economía vinculada ao sector primario do municipio, pero tamén de toda a comarca e do resto de Galicia, "así como dar visibilidade aos gandeiros que optan por mellorar a súa cabana bovina ao supor esta poxa un escaparate nacional".

O ano pasado, a poxa serviu, ademais, para dar a coñecer aos titulares das explotacións os novos retos para o sector lácteo, como mellorar a calidade do leite, e para homenaxear ao sector coa publicación de 'As Xentes do Leite', o primeiro libro onde os protagonistas son todos os profesionais que conforman a cadea de produción láctea, que editou o Concello de Curtis.