O Concello organiza este sábado a primeira edición do Torneo de Pádel Concello de Curtis, unha cita dedicada a impulsar a práctica deportiva e a convivencia entre os participantes. Os encontros disputaranse nas pistas de pádel de Curtis.

A competición desenvolverase ao longo de todo o día cun formato de fase de grupos, na que as parellas quedaron repartidas en tres grupos para xogar unha liguiña de todos contra todos. A partir dos resultados desa primeira fase, o torneo continuará cunhas eliminatorias divididas en fase Ouro (cos mellores clasificados de cada grupo) e fase Prata (de consolación), ata acadar as finais e a entrega de premios.

Os partidos da fase de grupos disputaranse ao mellor de dous sets cunha duración máxima establecida; as semifinais, ao mellor de dous sets cun super tie-break a 10 puntos, e as finais, ao mellor de tres sets sen limitación horaria. Toda a competición se xogará na modalidade de punto de ouro, cun sistema de autoarbitraxe entre as propias parellas participantes.

Co fin de garantir o bo estado das instalacións de cara ao torneo, desde o Concello de Curtis infórmase de que as pistas de pádel permanecerán pechadas tamén este venres 19, como medida preventiva para evitar posibles desperfectos.

O Concello de Curtis, a través da Área de Urbanismo, abriu cinco novos expedientes de declaración de ruína sobre edificacións que presentan un estado de deterioro avanzado e supoñen un risco para a seguridade dos viandantes. As actuacións responden ao traballo de localización e inspección que os servizos municipais levan a cabo de xeito continuo en todo o termo municipal.

Os inmobles afectados están situados na rúa Ronda da Coruña, na parroquia de Nosa Señora de Lourdes; no lugar da Baiuca, na parroquia de Fisteus; no lugar da Pedreira, na parroquia de Foxado; e dous na avenida Principal de Curtis.

No caso do inmoble da Pedreira, o Concello xa acadou un acordo coa propiedade para proceder á derruba da edificación e deixar o solar libre e sen perigo para a cidadanía. Neste sentido, cabe destacar que o goberno local prioriza a colaboración cos donos e donas das parcelas sempre que é posible.

Estas actuacións encádranse na liña de traballo que o Concello de Curtis vén desenvolvendo contra o feísmo e o deterioro do patrimonio edificado. Un exemplo recente é a culminación do expediente de derruba dunha edificación en ruínas no Igrexario, na parroquia de Fisteus, un proceso que se iniciara en maio de 2023 e que rematou coa demolición do inmoble trala declaración de ruína total.

De acordo coa Lei do Solo de Galicia, corresponde ás persoas propietarias o deber de manter os inmobles e solares en adecuadas condicións de conservación, seguridade e salubridade. En todo caso, desde o Concello de Curtis lémbrase que a tramitación desenvólvese sempre de xeito garantista cos dereitos do propietario, pero tendo en conta o rigoroso cumprimento da normativa.