O Concello de Curtis recibiu este sábado 26 de abril, nun acto celebrado na Casa Museo de María Antonia Dans, a doazón dun valioso busto que rende homenaxe á recoñecida artista. A obra, modelada no histórico taller de Isaac Díaz Pardo a partir dun deseño do prestixioso pintor Antonio López, pasa dende hoxe a formar parte do patrimonio artístico municipal. O acto foi organizado pola Asociación Amigos de Curtis e contou coa presenza de representantes do goberno local, entre eles o alcalde, Javier Caínzos; a concelleira de Benestar, Eva Lata; e a concelleira de Promoción Económica en Feiras, Fina Paredes, así como outros membros da corporación municipal. Tamén asistiron membros actuais e fundadores da Asociación Amigos de Curtis, xunto a familiares da artista: María, Lois e Anxo Dans. Con esta doazón, o Concello de Curtis reforza o seu compromiso coa conservación e difusión do legado cultural de María Antonia Dans e reafirma a súa aposta pola cultura como seña de identidade do municipio

O Concello de Curtis celebrou con gran éxito a XXIV edición da Comida de Maiores, un evento xa tradicional que tivo lugar no propio municipio e que reuniu a 458 persoas,. O acto contou coa presenza do Director Xeral de Maiores e Atención Sociosanitaria, Antón Acevedo.

Durante a celebración, rendeuse unha pequena homenaxe a Jesús García Peteiro, de 97 anos, e a Carmen Rico, de 92, como as persoas de máis idade do encontro. Ambos recibiron un detalle conmemorativo por parte do Concello de Curtis.

O menú degustación estivo composto por pratos tradicionais como a empanada, o polbo e o xarrete, así como tamén xeado, chocolate e biscoito. Ademais, como obsequio especial, cada un dos participantes recibiu unha baralla de cartas, símbolo de momentos de ocio e compañeirismo que se fomentan dende este tipo de encontros.

A xornada estivo amenizada por un dúo musical que animou o ambiente con cancións populares, facendo que moitos dos asistentes se animaran a bailar, convertendo o encontro nunha verdadeira festa para todos.

Dende o Concello de Curtis agradécese a asistencia e destácase a importancia de seguir promovendo iniciativas que favorezan a integración e recoñecemento das persoas maiores do municipio.