O Concello de Curtis reforzará a mobilidade e a seguridade viaria nas parroquias de Fisteus e Foxado grazas a dous proxectos de mellora da rede viaria aprobados no pleno celebrado este venres. As actuacións, amparadas pola segunda fase do POS+ Adicional da Deputación da Coruña, suman un investimento conxunto de preto de 450.000 euros e abranguen preto de once quilómetros de pistas municipais.

A primeira actuación, cun orzamento de 205.885,12 euros, desenvolverase na parroquia de Fisteus e comprende os camiños de Alvite-Piñeiro, Eirixe-A Casanova, Igrexario-Río dos Muíños e A Fraga-Cruce Mirás. A segunda, dotada con 241.866 euros, estenderase polas parroquias de Fisteus e Foxado e inclúe as pistas de Pardiñeiras-Baldarís, A Devesela-Rabuñas, As Mingueiras-Cabana, O Apeadoiro e o acceso a Samel.

En dúas das arterias incluídas (Eirixe-A Casanova e As Mingueiras-Cabana) executarase un sobreancho da calzada ata alcanzar os cinco metros de ancho útil, o que facilitará o cruzamento de vehículos e mellorará notablemente a seguridade. No resto das vías levarase a cabo a limpeza de beiravías e renovarase o firme.

Trátase dunha intervención necesaria tras o desgaste acumulado que sufriron estas vías polos efectos da meteoroloxía deste inverno. Coas obras, o Concello garante unhas comunicacións máis seguras e cómodas para a veciñanza do rural e reafirma o seu compromiso co mantemento das infraestruturas en todo o termo municipal.

O alcalde do Concello de Curtis, Javier Caínzos, destacou que “estas obras responden a unha necesidade das nosas parroquias, que este inverno acusaron especialmente o deterioro do firme”. O rexedor engadiu que o goberno local segue “investindo no rural para garantir que ningún veciño quede atrás en materia de mobilidade e seguridade viaria”.

O Pleno do Concello de Curtis aprobou unha moción de apoio á actualización do Plan Xeral de Normalización da Lingua Galega, co obxectivo de impulsar novas medidas que promovan o emprego do idioma en todos os planos da vida pública e retomar o diálogo na busca dun consenso para renovar o plan. O texto saíu adiante na sesión do pasado venres co voto favorable do grupo de goberno (PP), mentres que o BNG opúxose á proposta.

O texto aprobado remarca que ao longo da historia democrática de Galicia existiu "un escenario de consenso arredor da lingua", primeiro para a aprobación da Lei 3/1983, do 15 de xuño, de normalización lingüística, e máis adiante para o impulso do Plan Xeral de Normalización da Lingua Galega, "dous marcos reguladores que foron aprobados por unanimidade no Parlamento de Galicia".

Neste sentido, destaca que a Xunta vén de presentar "un documento con case 700 medidas para a actualización do Plan Xeral de Normalización da Lingua Galega", froito do traballo de máis de 130 profesionais de todos os sectores e de 1.400 achegas recibidas, tal e como cifra o documento. Conclúe reclamando que do debate político "xurda o consenso necesario para impulsar un novo marco regulador para o galego, o cal permita afrontar, como unha gran oportunidade, todos os retos de futuro que Galicia ten por diante".

Neste sentido, a moción recolle como acordos apoiar a actualización do plan “para o impulso de novas medidas que adapten o uso do idioma a todos os planos da vida pública”. Tamén “instar ás forzas políticas con representación no Parlamento de Galicia a retomar o diálogo co obxectivo de construír novos consensos sobre a política lingüística”, e dar traslado do acordo á Consellería de Cultura, Lingua e Xuventude e aos grupos do Parlamento autonómico.