• En apenas tres meses rexistráronse ataques mortais en cinco explotacións gandeiras de Santaia, Teixeiro, Ladrus e Portoseco.
• O Goberno local traslada unha queixa formal á Dirección Xeral de Patrimonio Natural pola "indefensión e impotencia" dun sector que perdeu vacas, novillas preñadas e ovellas en fincas próximas ás vivendas.

Concello de Curtis, 16 de xaneiro de 2026. – O Concello de Curtis deu un paso adiante na defensa do seu sector primario ao trasladar unha solicitude formal de intervención urxente á Dirección Xeral de Patrimonio Natural da Xunta de Galicia. A misiva denuncia a situación de "extrema gravidade" que atravesa o municipio tras unha vaga de ataques de lobo que, en só tres meses, castigou con dureza a polo menos cinco explotacións gandeiras.

O escrito remitido á Consellería de Medio Ambiente detalla unha cronoloxía de danos devastadora. Entre os casos máis recentes destacan a morte dun tenreiro de raza Rubia Galega en Xemeras (Teixeiro); a perda dunha novilla de 14 meses, unha vaca e unha novilla de dous anos preñada en Santaia (O Coto); un ataque a unha vaca na Corda (Teixeiro); a morte de tres ovellas en Ladrus e dous carneiros en O Portoseco.

Un risco permanente para a economía e a seguridade

Dende o Concello sublíñase que estes feitos non son episodios illados, senón unha "escalada de ataques sen precedentes". A preocupación municipal vai máis alá do valor patrimonial dos animais, apuntando ao grave impacto emocional e á inseguridade que xera a proximidade dos ataques aos núcleos rurais e vivendas.

"O sector primario é o motor de Curtis e non pode seguir sufrindo esta sangría de xeito permanente sen medidas drásticas", sinalan dende o Goberno local. A sensación de "impotencia e malestar" entre os gandeiros é total, xa que ven como as medidas preventivas actuais resultan absolutamente insuficientes ante a agresividade dos cánidos.

Petición de batidas e medidas excepcionais

Ante esta situación de emerxencia, o Concello de Curtis solicita oficialmente á Xunta:

1. A autorización urxente de batidas de control nas zonas afectadas para reducir a densidade de lobos.
2. A posta en marcha de medidas excepcionais de xestión que garantan a erradicación do risco permanente para as explotacións.
3. Unha redución da burocracia para que as intervencións sexan áxiles e eficaces.

O Goberno municipal conclúe o seu escrito poñéndose á enteira disposición da Administración autonómica para facilitar información ou coordinar unha xuntanza urxente co sector afectado, co obxectivo de frear unha situación que pon en xaque a supervivencia do rural galego.

V ACTA CAMPAÑA " O TEU POBO PREMIA "