O GDR ULLA TAMBRE MANDEO APROBA UNHA SUBVENCIÓN PARA RESTAURACIÓN DO RETABLO DA IGREXA DE SANTA EULALIA DE CURTIS

A Xunta directiva do Grupo de Desenvolvemento Rural Ulla Tambre Mandeo, aprobou o pasado mércores, 16 de outubro, unha nova subvención para un proxecto de recuperación patrimonial no Concello de Curtis. O beneficiario, a Asociación Cultural O Progreso, presentou un orzamento de 13.415,06 euros, segundo o cal, e unha vez aplicado o baremo para proxectos non produtivos, lle corresponde unha axuda de 7.062,50 euros.

O proxecto consiste na restauración do retablo da igrexa de Santa Eulalia de Curtis. Concretamente a acción centrarase no lateral dereito, parte que se atopa en peor estado de conservación. A igrexa de Santa Eulalia de Curtis, pertence á parroquia de Santaia, da que foi oriúndo o coñecido bispo San Pedro de Mezonzo.

O retablo pertence ó Neoclasicismo máis puro, movemento que despois da complexidade de formas que caracteriza ó Barroco, buscará a sinxeleza e pureza nas formas inspirado en modelos máis antigos. Está realizado en madeira tallada e unida mediante ensambles varios e cravos de ferro, consta dun só corpo dividido en tres espazos separados por dúas columnas de orde composto, pechando nos laterais con súas pilastras do mesmo orde.

A actuación de restauración consistirá na desinsectación, limpeza e recheo de novos materiais para frear os estragos dos insectos e do tempo e evitar a desintegración final da obra.

O vicepresidente do GDR, e alcalde de Curtis, Don Javier Caínzos Vázquez, ve moi interesante esta iniciativa e propuxo o Grupo de Acción Local que se financiara a dita actuación por contribuir de forma directa o mantemento e conservación do patrimonio histórico do Concello de Curtis.