Promoción dos produtos gastronómicos
Co obxectivo de animar o comercio e á vez promocionar os produtos gastronómicos da zona, cada ano organízanse a Exaltación do Cogumelo e a Feira da Nabiza e o Queixo de Curtis. Ambas celebracións son xa unha cita obrigada no calendario de festas de Galicia.
- Exaltación do Cogumelo
Os montes do municipio de Curtis ocultan centenares de variedades distintas de cogumelos e, cada ano, desde fai 17, o Concello celebra unha festa na que se exalta este exquisito produto local. Celébrase o último domingo do mes de outubro.
En colaboración cos comerciantes e hostaleiros, prepárase unha ruta para degustar o cogumelo preparado de diferentes maneiras. Ademais, organízanse saídas ao monte dirixidas por micólogos e impártense charlas nos colexios para explicar as propiedades e as distintas especies deste fungo.
- Feira da Nabiza e o Queixo de Curtis
O municipio organiza tras o verán a ruta gastronómica da Nabiza e o Queixo de Curtis. Os dous produtos danse a man nunha perfecta maridaxe nos locais de hostalaría da zona, onde se poden degustar en diversidade de receitas.
A fama do noso queixo de tetilla remóntase ao século XIX, cando famosos investigadores como Lucas Labrada ou Pascual Madoz eloxiaron a feira do campo da Illana (Fisteus), onde se vendían os días 5 de cada mes, o que deu lugar a que durante moito tempo todos os queixos de teto fosen identificados directamente como queixos da Illana, segundo lembra na súa páxina web o Consello Regulador.
