Sanidade comprométese a que o Centro de Saúde de Teixeiro estea atendido por un só médico de maneira permanente
- A situación normalizarase na segunda quincena deste mes, se para entón segue de baixa a médico titular.
A delegada territorial da Xunta e o director de Procesos de Atención Primaria confirmaron esta mañá ao Concello de Curtis que o Centro de Saúde de Teixeiro disporá dun médico de xeito ininterrompido na segunda quincena deste mes se para entón a titular aínda segue de baixa.
Os responsables autonómicos responderon así á reclamación exposta onte polo alcalde Javier Caínzos para que normalizasen o servizo e evitar que cada vez que os pacientes se achegasen ao Centro de Saúde se atopasen cun profesional distinto, que é o que estaba a suceder nos últimos meses ao estar a médico titular de baixa. O rexedor trasmitulles as numerosas queixas dos veciños a este respecto.
Sanidade explicou que os cambios de facultativos sufridos até agora viñeron derivados das dificultades de axustar os calendarios ao ser meses de vacacións de verán.