Curtis aposta por fomentar a empregabilidade da xente nova

Esta mañá o Espazo Xove de Curtis foi o escenario da celebración dun encontro sectorial sobre empregabilidade da xente nova, impulsado pola Consellería de Política Social, no que se realizaron varios obradoiros para potenciar a comunicación, a xestión de conflitos e as competencias profesionais.

Neste evento, que congregou a ducias de rapaces e rapazas do Concello, estiveron presentes a directora xeral de Xuventude, Cristina Píchel, e o alcalde curtiense, Javier Caínzos, quen destacou a importancia de desenvolver as competencias persoais básicas, como a comunicación, na procura activa de emprego.

Este encontró desenvolveuse ó abeiro do proxecto Lidera (España-Portugal), que pretende ofrecer ferramentas para que os mozos e mozas adquiran coñecementos e valores que lles axuden a descubrir as súas paixóns e as posibles saídas profesionais das mesmas.