• O obxectivo é que os comercios e a hostalaría se sumen á recollida de papel e envases, e as explotacións gandeiras á de plásticos agrícolas.

Antonio Fraga sostén que reducir os impropios, que ascenden a un 60% dos residuos, podería rebaixar os custos do servizo nun 15%.

O Concello de Curtis iniciará o luns, día 23, unha campaña informativa nos comercios e locais de hostalaría sobre a recollida porta a porta de cartón e papel e envases de plástico, así como nas explotacións agrarias sobre a recollida de plásticos agrícolas.

Un dos obxectivos da concellaría de Medio Ambiente, impulsora da campaña, é concienciar sobre a necesidade de usar correctamente os colectores co fin de reducir a porcentaxe de residuos impropios, é dicir, aqueles que non se depositan nos colectores adecuados, que no municipio rolda o 60%. O edil responsable, Antonio Fraga, asegura que un bo uso dos colectores facilitará a reciclaxe, permitirá un maior coidado do medioambiente e conseguirá unha redución do custo do servizo de recollida de RSU. “Se botamos o lixo onde debemos, a rebaixa no gasto podería ser do 15%, o que tamén suporá un aforro para as familias”, sostén.

Outro dos fins da campaña é ofrecer aos gandeiros e agricultores un servizo de recollida porta a porta que solucione a vertedura incontrolada de plásticos agrícolas ou a súa incineración ao ser un residuo altamente contaminante. O Concello xa recolle estes plásticos a medio centenar de explotacións cada dous ou tres meses, e Antonio Fraga confía en que se acaben inscribindo todas as do municipio.

A campaña, para a que se elaborou un díptico e que consistirá en visitas personalizadas para explicar estes servizos de recollida, realizarase até mediados de decembro.

• O alcalde de Curtis destacou a importancia de defender os intereses do sector, “vital para a economía local”.

O alcalde de Curtis, Javier Caínzos, reuniuse con máis de 80 gandeiros dos 112 propietarios de explotacións gandeiras do municipio que foron convidados a participar para explicarlles cales son as medidas que desde o Concello están a adoptarse para apoiar esta importante actividade económica, vital, ademais, para a supervivencia dos núcleos rurais. “Os gandeiros dispondes e disporedes sempre de toda a nosa axuda en defensa dos intereses do sector lácteo, que dá de comer a decenas de familias no noso municipio e que é fundamental para a nosa economía local”, comentoulles o rexedor.

Entre as medidas postas en marcha, Caínzos resaltou:

- A entrada en vigor en 2016 da nova exención do IBI para edificacións agrarias, do 95% para as edificacións das explotacións que estean en parcela individual e do 50% ás edificacións agrarias que estean na parcela con edificacións para outros usos.

Os veciños deben solicitar a exención antes do 30 de novembro.

- Modificación dos usos do solo no PXOM de urbanos a rústicos para adaptalos á nova realidade dos núcleos rurais. Nestes momentos, o Concello recibiu xa 96 solicitudes correspondentes a 60 núcleos. Esta en fase de licitación a modificación. Prevese que se aprobe a finais do 2016.

- Seguimento aos acordos que regulan o prezo do leite. O Concello estará vixiante para que se cumpran os acordos asinados hai dous meses e denunciará, como fixo até agora, todos os incumprimentos xa sexa no pago dos prezos mínimos ou polo uso do leite como reclamo. Ademas, ponse a disposición de todos os gandeiros para dar traslado das súas reclamacións.

- Recollida de plásticos agrícolas. As explotacións gandeiras e agrícolas do municipio poden solicitar no Concello ou a través da nova APP municipal a recollida destes plásticos, altamente contaminantes. O Goberno local porá en marcha a próxima semana unha campaña de información deste recollida, así como dos enseres.

- Campaña de apoio ao consumo do leite 100% de Galicia, fundamental, sostivo o alcalde, “para garantir a supervivenia do sector”. O Goberno local colocou adhesivos en todos os comercios e locais de hostalaría así como carteis nas principais estradas, nos colexios, edificios públicos, etc.

- Campaña de saneamento. Este ano apareceron brotes de tuberculose en varias explotacións do Concello, que está a disposición dos veciños para realizar as xestións necesarias ante os técnicos de Sanidade Animal da Xunta para informar ou aclarar todas as dúbidas que xurdan respecto diso.