Os veciños pagarán polas taxas e impostos municipais as mesmas tarifas de 2013

O Goberno Local conxelará, por terceiro ano consecutivo, as taxas e impostos nos orzamentos do vindeiro ano.
Javier Caínzos considera fundamental non gravar máis as economías familiares, "o que podemos facer ao dispor dunhas contas municipais saneadas".

Co fin de non sobrecargar as economías familiares, o Concello de Curtis volverá en 2016 a conxelar as taxas e impostos dependentes da administración local. É dicir, os veciños pagarán polos servizos municipais o mesmo que en 2013 ao ser este o terceiro ano consecutivo que o Goberno local aposta por non gravar os tributos. A proposta levarase para a súa aprobación ao pleno de orzamentos deste mes.

A conxelación afectará tanto aos servizos de xestión directa por parte do Concello como aos xestionados por empresas concesionarias como o tratamento de auga potable ou o saneamento de augas residuais, nos que a administración local asumirá a subida do custo do IPC para que non repercuta nos veciños.

O alcalde Javier Caínzos destacou a boa saúde financeira do Concello, que o ano pasado xa puido amortizar de forma anticipada a débeda viva, o que permitirá que a economía municipal aguante ao non incrementar os impostos nin se vexa afectada pola rebaixa nos ingresos previstos tras a aplicación das bonificacións no IBI para as explotacións gandeiras e ás familias numerosas, nin por outros beneficios fiscais.

No capítulo de ingresos, mantense estable o referido ás transferencias correntes pero increméntase bastante a previsto vía transferencias de capital, un 233%, debido a que se contará con maiores ingresos por subvencións.