• Prevé destinar máis de 300.000 euros en melloras viarias e 183.873 euros en gastos de persoal.

O Goberno curtiense prevé un investimento en 2017 superior aos 300.000 euros na mellora e rehabilitación de varios viarios do municipio, tanto en zona rural como urbana, con cargo ao Plan Único de Concellos POS+. Tamén incluirá unha achega de 183.873 euros para gastos correntes, pero non solicitará ningunha cantidade para o pago a provedores ao estar as contas municipais saneadas.

Concretamente, o equipo de Goberno proxecta ampliar e reforzar o firme do acceso a Quintadoniga e O Pereiral desde Penedo Rendal co fin de incrementar a súa capacidade para soportar o paso de maquinaria agrícola pesada, e rehabilitaranse as calzadas das rúas M.A Terrón e Alcalde Espiñeira, en Curtis, para evitar aumentar os custos en conservación e mantemento e posibilitar unha mellor resposta ante o aumento da intensidade do tráfico rodado.

Ademais, o Concello prevé pavimentar os camiños de acceso aos núcleos de Fisteus desde a N-634 nun tramo de dous quilómetros e medio, e a Gulpilleira, en ligazón de Vilardois, desde a AC-231, nun tramo dun quilómetro e medio.

A aprobación destas obras irá ao Pleno Extraordinario convocado para o xoves, día 23, así como as previstas no Plan Complementario, que inclúe reforzar o firme da calzada da estrada que vai da N-634 á Illana e do camiño de acceso ás Pereiras desde a mesma nacional, así como a rehabilitación da calzada da rúa Río Mandeo. O orzamento previsto neste caso é de 161.740 euros.

O CEIP de Teixeiro dispón desde principios de ano de baños adaptados para alumnos con problemas de mobilidade. A actuación, coordinada entre o Concello curtiense, a Xefatura Provincial de Educación e o centro educativo, requiriu dun investimento de 6.000 euros.

Ademais desta adaptación, os operarios municipais cambiaron a rede de tubaxes de entrada de auga, que eran de ferro, por PVC de alimentación desde a entrada ata os aseos do colexio.

Coas obras do baño, quedan resoltos os problemas de accesibilidade deste CEIP, que xa dispuña dun acceso desde o exterior a través de ramplas e zonas libre de obstáculos sen que existan problemas de xiros en caso de ir en cadeira de rodas. En canto á mobilidade do interior, o centro escolar conta cun elevador eléctrico desde hai anos.