O Concello de Curtis continúa a mellorar a rede viaria municipal coa posta en marcha de dúas obras de rehabilitación de firmes. As actuacións, que supoñen un investimento superior aos 142.000 euros, permitirán renovar o pavimento e reforzar a seguridade viaria en distintos puntos do termo municipal.

A primeira obra corresponde ao camiño de acceso ao Vilar, onde se está a aumentar o ancho útil da calzada a cinco metros e se mellorará a seguridade, especialmente para os peóns. Estes traballos foron adxudicados por 68.629,74 euros e xa deron comezo.

A segunda actuación desenvolverase nos tramos de Labrada-San Cibrá e nos accesos a Recareo e Gorxá desde a estrada AC-231, onde se levarán a cabo obras de pavimentación e reforzo do firme. Neste caso, o importe de adxudicación ascende a 73.593,98 euros e as obras comezarán nos vindeiros días.

Con estas dúas intervencións, o Concello de Curtis garante unhas óptimas condicións de circulación en toda a contorna.

O alcalde, Javier Caínzos, destacou neste sentido o “traballo constante” do Concello no mantemento e mellora da rede viaria municipal: "Os nosos camiños son fundamentais para a calidade de vida da veciñanza do rural e para a seguridade de todos os que os utilizan, polo que nos implicamos para que estean nas mellores condicións posibles".

O Concello de Curtis dá un paso adiante na seguridade das festas que se van desenvolver no municipio. Co obxectivo de manter informados e preservar o benestar de todos os veciños e veciñas, así como persoas visitantes, procedeuse á instalación, na fachada do Consistorio, en Teixeiro, un gran panel informativo no que se pode consultar a Memoria Técnica de Seguridade realizada por unha empresa experta neste eido.

No panel pódese apreciar a delimitación dos espazos exactos nos que se permite a instalación de atraccións de feira e barracas. Do mesmo xeito, tamén se contemplan as vías de evacuación que deben quedar sempre libres para o paso de vehículos de urxencias como ambulancias, servizos de emerxencia, etc.

Este plan estará activo en dous escenarios clave: durante o desenvolvemento da festa, mentres se levan a cabo os espectáculos musicais na Praza de España, e nos períodos de descansos entre sesións ao longo do día, onde non hai actividade musical pero as atraccións de feira manteñen a súa posición nas rúas.

Desde o Concello destacan que “os cambios organizativos requiren un tempo de adaptación, pero abrir camiños á seguridade é innegociable. Con este novo deseño do espazo urbano garantimos que a resposta sexa inmediata ante calquera incidente, sen perder nin un chisco da ledicia que caracteriza estas festas”.

Na mesma liña, animan á veciñanza a “consultar o panel e toda a información que contén para, entre todos, desfrutar dunhas festas con sentidiño”.