O Concello de Curtis pon en marcha un club de conversación en inglés para impulsar a mellora deste idioma entre os mozos
O Concello de Curtis porá en marcha talleres prácticos de inglés para aqueles mozos maiores de 16 anos que desexen mellorar este idioma con prácticas de charla nun ambiente relaxado. A través da creación deste club de conversación, o Goberno local quere axudar aos estudantes a manexar o inglés con maior soltura.
A actividade, de carácter gratuíto, estará dirixida pola moza voluntaria rusa Daria Turkova, licenciada en Filoloxía Inglesa, que se uniu o pasado mes de setembro aos equipos municipais de Cultura e de Formación. A iniciativa enmárcase no programa de Servizo de Voluntariado Europeo, cofinanciado polo Erasmus+.
As charlas desenvolveranse os sábados a partir do próximo día 28 de xaneiro, de 16.30 a 18.00 horas, no Centro de Lecer de Curtis.
Os mozos interesados deberán inscribirse nas oficinas municipais (telf. 981 777 105).