- A entrada será un donativo para apoiar a campaña 'Unha cura para Adri'
O polideportivo municipal de Teixeiro volverá acoller por segundo ano consecutivo o Campionato de Powerlifting de Galicia, que converterá ao municipio de Curtis no centro dos afeccionados a este deporte de forza. A data será o sábado, 4 de febreiro, día no que se celebrará tamén o I Open Nacional 'Concello de Curtis', é dicir, unha proba non oficial aberta a quen queira participar.
Este ano, ademais, a entrada terá carácter benéfico xa que será un donativo para apoiar a campaña 'Unha cura para Adri', o pequeno de Ares que sofre a síndrome de Hunter. A recadación destinarase á investigación da terapia contra esta rara enfermidade.
Da organización e das inscricións deste certame, que depende da Concellaría de Deportes, encárgase Santiago Fernández Linares, Guti, embaixador de Curtis, monitor dos ximnasios municipais e que foi campión de España na categoría de press banca open e subcampión do mundo en peso morto. O ano pasado, ao I Campionato acudiron sesenta deportistas que conseguiron varias marcas nacionais.
Con esta proba, o Goberno local reforza a súa aposta por impulsar tanto o coñecemento e a práctica de diversas disciplinas deportivas así como pola organización de actividades e campionatos que axuden a promocionar o municipio a través de colaboracións coas federacións galegas de fútbol sala, atletismo, halterofilia e boxeo.