A comisión de seguimento do Plan de Transporte Metropolitano de Galicia na área da Coruña reuniuse esta mañá na Delegación de Goberno para dar luz verde á prórroga para 2017 deste servizo, no que está incluído o municipio de Curtis, mentres non se proceda de novo á súa licitación.

Esta reunión, á que acudiu o alcalde de Curtis, Javier Caínzos, tamén fixou os compromisos de financiamento dos municipios, que achegan un 20% do custo do servizo. No caso do Concello curtiense, a súa achega en 2017 será de 3.681,41 euros.

A integración do municipio no Plan de Transporte Metropolitano, efectiva desde o ano pasado, supuxo un aforro nos billetes de autobús para os veciños que se trasladan á área coruñesa entre un 30% e un 50% en función das bonificacións e do número de viaxes que se realicen.

• O Consello Escolar aprobou unha listaxe provisional de 49 alumnos de 0 a 3 anos

O Consello Escolar da Escola Infantil A Galiña Azul de Curtis aprobou para o vindeiro curso a adxudicación de 49 prazas para nenos de 0 a 3 anos de idade, que foron as que se solicitaron no baremo ordinario de marzo. Esta proposta trasladarase á xerencia do Consorcio Galego de Servizos de Igualdade e Benestar, que prevé publicar a lista provisional de admitidos o 3 de maio.

Este ano foi o que maior número de solicitudes se recibiu desde que abriu o centro situado en Teixeiro. O ano pasado iniciaron o curso 48 nenos, e incorporáronse despois outro cinco máis.

A Escola Infantil ten capacidade para 61 alumnos, polo que aínda poden entrar máis ao non estar pechado o proceso de matriculación. O ano pasado non houbo ningún neno dos que solicitaron praza que quedase excluído.

Despois da publicación da lista provisional, abrirase o prazo de inscrición e o prazo de matrícula.