• Esta XVIII edición, que se celebrará o fin de semana do 28 e 29 deste mes, quere atraer aos afeccionados á micoloxía e aos amantes da gastronomía elacionada con este produto.
• O IV Feira do Comercio Local organizarase este ano durante os dous días.

O Concello de Curtis celebrará os días 28 e 29 deste mes as xornadas da XVIII Exaltación dos Cogomelos de Teixeiro cunha completa programación xa consolidada que mestura gastronomía, música e comercio local co obxectivo de atraer ao municipio ese fin de semana aos afeccionados á micoloxía e aos amantes da gastronomía relacionada con este produto.

O inicio das actividades proxectadas para impulsar un dos produtos estrela do municipio, en cuxos montes nacen centos de variedades diferentes, será o venres, cunha charla micolóxica que impartirá un experto no salón de Plenos do municipio, ás 19.30 horas. Da teoría pasarase á práctica, xa que o sábado, ás 10.00 horas, organizarase unha saída ao monte, dirixida por un micólogo da Asociación Pan de Raposo e que é aberta á participación de todos os interesados. As variedades que se consigan exporanse á mañá seguinte diante do Concello.

Durante o resto do día, o comercio será o protagonista xa que a Asociación de Comerciantes de Teixeiro celebrará o IV Feira do Comercio Local, que este ano como novidade manterá aberta a carpa coas casetas que se instalan na Praza de Teixeiro durante todo o fin de semana. Ademais, pola tarde, celebrarase, a partir das 19.00 horas, o IV Dakar Ghaiteiro, e a partir das 22.00 horas, o VII Ruada de Teixeiro, organizada por asociación cultural Faragulla en casa Miraz, na que participarán distintos grupos de cante e baile tradicionais.

O domingo será a xornada dedicada á ruta gastronómica por Curtis e Teixeiro. Un total de 24 locais ofrecerán a oportunidade de degustar as distintas receitas de tapas, petiscos e comidas elaborados con cogomelos, desde as máis tradicionais ás máis arriscadas.

Compoñente europeo

Ese día terá tamén un compoñente intercultural xa que, ás 11.00 horas, no Multusos de Teixeiro celebrarase o irmandamento do concello de Curtis con municipios doutros 6 países europeos, Italia, Portugal, Hungría, Bulgaria, Estonia e Eslovaquia, co fin de promover conxuntamente o voluntariado como ferramenta de promoción do compromiso cidadán coa sociedade. Ao acto acudirán máis de medio centenar de representantes de distintos colectivos e institucións deses países e o Goberno local quere aproveitar a oportunidade para promocionar os produtos locais en Europa.

•  Tríptico do Programa do XVIII Exaltación dos Cogomelos de Teixeiro

A área de Benestar Social e de Cultura do Concello de Curtis organiza unha excursión a Pontevedra e a Combarro para o colectivo da terceira idade o vindeiro 20 de outubro.

As persoas interesadas nesta actividade programada no marco do Programa de Lecer Activo, poden formalizar xa a súa inscrición até o día 16 de outubro na Casa do Concello en Teixeiro (Telf. 981789003) ou nas dependencias municipais de Curtis (Telf. 981777105). É imprescindible presentar o carné da terceira idade.

O número de prazas ascende a 110 e o prezo é de 12,41 euros.

O Concello de Curtis abre ata o próximo día 22 de setembro o prazo de inscrición nas actividades deportivas e talleres continuos que se desenvolverán ata o verán de 2018 nas instalacións municipais de Curtis e Teixeiro.

O programa incluirá, para os máis novos e a través das Escolas Deportivas Municipais, fútbol e fútbol sala, patinaxe, ximnasia artística, baile e manualidades. Os adultos poderán participar nas clases de baile, de mantemento integral e de pilates-streching, así como en manualidades e obradoiros de memoria e de prevención da demencia.

As actividades, que se porán en marcha se se inscriben un mínimo de 15 alumnos, comezarán o 2 de outubro, menos o fútbol e fútbol sala, que se iniciaron este mes.

O programa incluirá, como actividades de carácter gratuíto, clases de informática e de inglés para adultos e para nenos. Ademais, tamén de maneira gratuíta, porase en marcha o programa Educando en Familia, destinado a nenos e nenas de 0 a 3 anos acompañados polos seus pais, que centra as súas actividades no desenvolvemento mental, psicomotor, afectivo e sensorial dos pequenos, así como na atención aos seus pais.

•  Programa completo e información sobre as actividades: