O prazo de inscrición para os campamentos deportivos de verán da Deputación de A Coruña, destinados a nenos/as de 0 a 14 anos de idades, finalizará o 15 deste mes.
A quenda destinada ao concello de Curtis será do 8 ao 13 de xullo.
A área de Deportes do Concello de Curtis acaba de abrir o prazo de inscrición para as actividades deportivas de natación, pádel e aquagym (ximnasia acuática), que se organizarán do 2 de xullo ao 31 de agosto.
A inscrición, obrigatoria e que esixirá cubrir a ficha oficial, pódese realizar xa ata o 26 de xuño na Casa do Concello, en Teixeiro, ou nas dependencias municipais no recinto da Feira Comarcal de Curtis. O prezo será de 12,41 euros mes por actividade.
A idade mínima para participar nos cursos de natación será os nados en 2014, e para pádel, os nados en 2010.
O día 2 de xullo, ás 12.00 horas, será cando se distribúan os grupos e os horarios para as actividades nunha reunión nas piscinas municipais.
A V Ruta Cabalar Campestre de Curtis reunirá o 17 de maio, coincidindo co Día das Letras Galegas, a decenas de xinetes que, un ano máis, realizarán un percorrido de 20 quilómetros por algúns das paraxes naturais máis espectaculares do municipio.
A xornada, organizada por un colectivo amante dos cabalos en colaboración co Concello de Curtis, iniciarase ás dez da mañá nas naves do Campo da Feira de Curtis, onde se xuntarán as monturas e os carros de cabalo para saír cara á primeira parada, no lugar de Xabriño, para regresar ao mediodía ao recinto feiral, onde se celebrará unha comida de confraternidade.
Despois da comida sortearanse distintos agasallos doados por empresas do municipio, entre o que este ano destaca un poldro, e finalizará a festa con música.
Os interesados en participar nesta ruta natural poden formalizar xa a inscrición.
O departamento de Deportes do Concello de Curtis celebrará a V Edición da Carreira Popular Curtis-5K o 5 de maio, sábado. A proba pertence ao VI Circuito Provincial de Carreiras Populares da Deputación da Coruña.
A competición absoluta disputarase sobre unha distancia de 5 km homologados pola Real Federación Española de Atletismo (RFEA) e poderán participar atletas federados e non federados. Haberá unha sola clasificación conxunta.
A participación está aberta a todas as idades, aínda que nesta edición se quere facere un especial esforzo para animar á inscrición de nenos e adolescentes para que empecen desde pequenos a realizar actividade física de forma habitual e que esta forme parte do seu estilo de vida.
Premios e agasallos
O CIM de Curtis organizará mañá, día 21, un taller de risoterapia coa colaboración da Asociación de Mulleres de Teixeiro no local social do colectivo, ás 16.30 horas, no que se desenvolverán dinámicas divertidas encamiñadas a mellorar os estados de ánimo e de saúde, aproveitando tamén os beneficios fisiológicos da risa.
Desde o Centro de Información ás Mulleres lémbrase que cando unha persoa se ri a gargalladas actívanse entre 100 e 400 músculos e que a risa mobiliza a columna vertebral, o que axuda a aliviar a tensión e as dores de costas, mellora a tensión arterial e achega máis osíxeno, ademais de segregar hormonas da felicidade: serotonina, dopamina, adrenalina e endorfinas, que producen unha sensación física de benestar global.
A sesión englobará unha serie de dinámicas vivenciais nas que se combinarán movemento, xogos e técnicas procedentes da meditación activa, as dinámicas de grupo e o baile libre.
Ao taller, que se lle ofreceu a todas as asociacións de mulleres do municipio, poden ir as persoas que o desexen.
Taller de primeiros auxilios na Escola Infantil
O CIM de Curtis impartirá mañá e pasado un curso de primeiros auxilios na Escola Infantil A Galiña Azul de Curtis, dirixido a pais, nais e profesores para aprender a previr e a como actuar ante situacións de risco dos máis pequenos. O curso será ás 18.00 horas, e tamén estará aberto a todos os interesados.
