O equipo de goberno proporá no pleno de hoxe distribuir os fondos do POS na mellora da rede viaria, gasto corrente, servizos sociais e conciliación
O Concello de Curtis celebra hoxe unha sesión plenaria ordinaria na que se someterá a votación o POS+ 2024, cifrado en 410.783,30 euros, e no que se inclúe dúas actuacións de mellora de rede viaria cun total de 3.212 metros. Trátanse da rehabilitación do firme en “Foxado-Portofoxado, acceso a Morangueiros e Vilarullo, entre outros” cunha inversión de 179.422,59 euros e a e a rehabilitación no camiño Abeledo-Portocelo (Foxado) cunha inversión de 43.683,31 euros. Ademais, tamén se recolle unha partida de 187.677,40 euros para gasto corrente en iluminación pública, limpeza e mantemento de edificios públicos.
Inclúense como obras complementarias, por se se amplía a contía ou se se producen baixas nas licitacións, o reforzo do firme en DP3201- A Hedreira (Santaia) cunha inversión de 59,395,37euros e a rehabilitación da calzada e pluviais na rúa Quenllos (Lourdes) cunha inversión de 167.009,66 euros.
Na mesma sesión tamén se abordarán os 66.103,06 euros do Plan POS+Adicional 1/2024 dos cales a maior partida, ao igual que o ano pasado, irá destinada a sufragar o gasto en medidas de conciliación cun importe de 36.600 euros seguido de 18.503 euros destinados ao servizo de acompañamento para combatir o illamento da terceira idade denominado “Ao teu carón”. A este séguelle unha partida de 6.000 euros para axudas de emerxencia ás persoas soas ou familias en risco de exclusión social e 5.000 euros para a adquisición de equipamento técnico asistencial como camas, cadeiras de rodas, grúas...
