O Concello de Curtis recibiu este martes a visita oficial da conselleira de Medio Ambiente e Cambio Climático, Ángeles Vázquez, na parcela situada en Fisteus onde se construirá o primeiro Centro de Protección Animal de Galicia. Trátase dunha infraestrutura pioneira que dará servizo aos concellos galegos con menos de 5.000 habitantes e que permitirá reforzar, desde o ámbito autonómico, o importante labor que realizan as administracións locais no coidado e acollida de animais abandonados.

O novo centro situarase nunha parcela de preto de 24.000 m² pertencente ao proceso de reestruturación parcelaria de Fisteus, unha localización estratéxica pola súa conectividade e proximidade a concellos rurais que carecen de recursos específicos neste ámbito. O recinto ocupará unha superficie construída de 2.300 m² e contará cunha capacidade para 300 cans e 200 gatos.

As instalacións incluirán áreas específicas para corentena, maternidade, illamento infeccioso, hospitalización e atención de animais agresivos, así como un módulo veterinario completamente equipado con salas de consulta, quirófano e sala de radioloxía, ademais dunha área administrativa para a xestión do centro.

O proxecto contará cun orzamento inicial de 2,07 millóns de euros, cofinanciado con fondos europeos Feder, e supón un exemplo de colaboración institucional para dar resposta a unha realidade crecente no rural galego.

Desde o Concello de Curtis queremos agradecer á Consellería de Medio Ambiente e Cambio Climático a súa aposta polo noso territorio como sede deste centro pioneiro e o seu compromiso coa protección e benestar animal. Con iniciativas coma esta, reforzamos a cooperación entre administracións e melloramos a calidade dos servizos que ofrecemos aos nosos veciños e veciñas, así como aos animais que precisan atención e coidado.

O Concello informa sobre a ampliación do prazo de presentación de solicitudes ata o vindeiro luns 26 de maio dos procesos sele ctivos depeón forestal do programa APROL RURAL, e dos procesos selectivos de dous peóns a xornada completa e dous peóns a xornada parcial de obras e servizos mínimos.

Podes consultar as bases nos seguintes links:

- Bases do proceso selectivo para a formación dunha lista de contratación de peóns forestais do programa Aprol Rural 2025.